Бірлескен спутниктерді әзірлеу және жаңа технологияларды орбитада сынау - Түркі мемлекеттері ұйымына (ТМҰ) мүше мемлекеттер ынтымақтастығының практикалық бағыттарының бірі. Қазақстан бұл жұмысқа Астанадағы «Ghalam» ЖШС әзірлеп жатқан 12U форматындағы OTS-SAT спутнигі жобасы арқылы қатысады.

Аппарат орбитада технологияларды көрсетуге және ғарыш ортасы жағдайында спутниктік кіші жүйелерге арналған жаңа техникалық шешімдерді тексеруге арналған. Жоба спутникті әзірлеуді, оны пайдалануды басқаруды және ТМҰ елдері арасындағы өзара іс-қимылды дамытуды қамтиды.

Ғарыш өнеркәсібіндегі ынтымақтастық әлеуетін дамыту туралы негіздемелік шарт мұндай кооперацияны кеңейтуге негіз қалайды. Құжатқа Әзербайжан, Қазақстан, Түркия және Өзбекстан өкілдері 5-9 қазанда Антальяда өткен 77-ші Халықаралық астронавтика конгресі (IAC 2026) аясында қол қойды.

Шарт ғарыш технологиялары, спутниктерді әзірлеу, ғылыми зерттеулер, өнеркәсіптік кооперация және мамандар даярлау салаларында жүйелі өзара іс-қимылды көздейді.

ТМҰ Бас хатшысы Куб

анычбек Омуралиев құжатқа қол қойылуын құптап, оның түркі әлеміндегі ғылыми, технологиялық және өнеркәсіптік ынтымақтастықты нығайтудағы маңызын атап өтті. Оның айтуынша, OTS-SAT спутнигін жасау тәжірибесі ғарыш саласындағы неғұрлым ауқымды бірлескен бастамаларға негіз бола алады.

Қазақстан үшін бұл уағдаластықтар бірлескен жобаларға қатысуға, тәжірибе алмасуға, ғылыми-технологиялық және өндірістік құзыреттерді дамытуға қосымша мүмкіндіктер ашады. Аэроғарыш комитеті шартты ғарыш саласындағы халықаралық ынтымақтастықты және ТМҰ-ға мүше мемлекеттердің ортақ әлеуетін нығайтудың маңызды кезеңі ретінде қарастырады.