«Қазақстан Ғарыш Сапары» ҰК АҚ және Кения ғарыш агенттігі өзара түсіністік туралы меморандумға қол қойды 


IMG_6130 (1).JPG


2026 жылғы 20 мамырда Тәуелсіздік сарайында Қазақстанға мемлекеттік сапармен келген Кения Президентін ресми қарсы алу рәсімі барысында, екі мемлекет басшысының қатысуымен «Қазақстан Ғарыш Сапары» ҰК» АҚ мен Кения ғарыш агенттігі (Kenya Space Agency) арасында Жерді қашықтықтан зондтау, ғарыш жүйелерін әзірлеу және ғарыштық технологияларды қолдану саласындағы өзара түсіністік туралы меморандумға қол қойылды.

Құжатқа «Қазақстан Ғарыш Сапары» ҰК» АҚ Басқарма төрағасы Қайыржан Қожаев пен Кения ғарыш агенттігінің бас директоры, бригадалық генерал Хиллари Бивотт Кипкосгей қол қойды.

Қазақстан Республикасының Президенті Қасым-Жомарт Тоқаев қол қойылған құжаттардың стратегиялық маңызын атап өтті. Кенияның Африканың «Кремний саваннасы» ретінде кеңінен танымал екенін айта келе, Мемлекет басшысы Қазақстанның электрондық үкімет пен заманауи банк инфрақұрылымы салаларындағы озық тәжірибесімен бөлісуге, сондай-ақ жасанды интеллект пен ғарыш технологиялары бағыттарындағы ынтымақтастықты дамытуға дайын екенін жеткізді.

Қол қойылған меморандум Қазақстан мен Кения арасындағы ғарыш саласындағы өзара тиімді әрі ұзақмерзімді ынтымақтастықты нығайтуға жаңа мүмкіндіктер ашады.